ಹಲ್ಕಾ ಕವಿತೆಗಳು
ನಿಖರವಾಗಿ ಹೇಳಲಾಗದ ತೊದಲುಗಳಿಗೆ
ಬಲ್ಲವರಾರೋ ಒಲವೆಂದನ್ನುತ್ತಾರಂತೆ
ನಾನಂತೂ ದಟ್ಟ ಕಾಡಿನ ಒರಟುಮರದ
ಮುಳ್ಳಿನ ಮೇಲೆ ಬಿದ್ದ ಗುಲ್ಮೋಹರಿನ
ಎಸಳಿನಂತೆ ಭಾವಿಸುತ್ತೇನೆ
ಕಾರಣಗಳಿಲ್ಲದ ಕವಲೊಡೆಯುವ
ಏಕಾಂತದ ಬಳ್ಳಿ ನನ್ನ ಸುತ್ತಿ ಕೊಂಡಿದ್ದರ
ಪರಿಣಾಮ ಇನ್ನೂ
ಅಸ್ತವ್ಯಸ್ಥ ಉತ್ತರಗಳು ಮುಂದೆ ಕುಣಿಯುತ್ತದೆ
ನಿಮಗೇನಾದರೂ ಗೊತ್ತಿದ್ದರೆ ಬಿಡಿಸಿಬಿಡಿ
ನೀಲಜಡೆಯ ಮುಡಿಗೆ ಗಂಟಾಕಿದ ಮೊಗ್ಗನ್ನು
ನೋಡಿ ಒಲವಾಯಿತಂತೆ ನನಗೆ
ಹಾಗೆಯೇ ಗಾಳಿಯ ಕಡೆ ತೇಲಿಬಿಟ್ಟ
ಮುಂಗುರುಳಿನ ನಲಿದಾಟಕ್ಕೆ ನಾ ಸೋತದ್ದು
ಅನ್ನೋವಾಗ ಇನ್ನೂ ಗೊಜಲು
ಸವೆಯುವುದಕ್ಕಿರುವ ಇದೇ ಜನ್ಮದಲ್ಲಿ
ಸಂಗ ಬರುವವಳಾದರೆ ಸ್ವಾಗತವಿತ್ತು
ಮುಂದಿನ ಜನ್ಮಕ್ಕೆ ಕಾಯುವಷ್ಟು
ದೃಢ ಮನಸ್ಸು ನನ್ನಲ್ಲಿ ಇಲ್ಲ ಹುಡುಗೀ.!!
#ಅವಿಜ್ಞಾನಿ
- ಅವಿಜ್ಞಾನಿ
08 May 2017, 08:33 pm
Download App from Playstore: