ಮಳೆ ಹನಿಯೊಂದು...
ಮಳೆ ಹನಿಯೊಂದು ಬಂದು
ಭುವಿಗೆ ಬಿದ್ದಾಗ..
ಕಲ್ಲ ಪೊಟರೆಯಲ್ಲಡಗಿದ್ದ ಕಪ್ಪೆ
ಕುಪ್ಪಳಿಸಿತೊಮ್ಮೆ ಖುಷಿಯಲ್ಲಿ
ಕೆಮ್ಮಿ ಗಂಟಲ ಸರಿ ಪಡಿಸಿಕೊಂಡು
ಕಾರ್ಮುಗಿಲು ಭುವಿಯ ಕವಿದಿಹುದ ಕಂಡು
ತನ್ನ ಬಂದು ಬಳಗವ ಕರೆಯಲು
ತನ ತೋಮ್ ಎಂದೆನ್ನುವುದಕೆ
ತಯಾರಾಗಿತು ಆಗಲೇ..
ಎಂದೋ ಉದುರಿ ಹಕ್ಕಿಯುದರವ ಸೇರಿ
ಹೇಗೋ ಉರುಳಿ ಉಳಿದುಕೊಂಡಿದ್ದ ಬೀಜವು
ಮರಳಿ ಕೊನರಿ ಹೆಮ್ಮರವಾಗಲು
ಸಾವಕಾಶದಿ ಆಕಾಶ ನೋಡುತ
ನವಿರುಗೊಂಡಿತು ನೆಲದಲಿ...
ಬೆವರ ಸುರಿಸುತ ಬರಿಯ ಮೈಯಲ್ಲಿ
ಬರದಿ ಬಸವಳಿದಿದ್ದ ರೈತನ
ಬೆನ್ನ ಮೇಲೆ ಬಿದ್ದ ಹನಿಯದು
ಬದುಕು ಕೊಡುವೆನೋ ಎಂದಿತು.
- ಶ್ರೀಗೋ.
09 Jun 2017, 07:30 pm
Download App from Playstore: