ಹೊಸ್ತಿಲ ದಾಟಿ....
ಹೊರಟಿರುವೆನಮ್ಮ ಹೊಸ್ತಿಲ ದಾಟಿ
ಎಲ್ಲರದೆಯಲ್ಲೂ ಬೀಳ್ಕೊಡುವ ನೋವ ಮೀಟಿ
ನಾ ಕಂಡ ತಾಯ ಮಡಿಲಾಗುವುದಿನ್ನು ಅಪರಿಚಿತ
ಎತ್ತಾಡಿಸಿದ ಅಪ್ಪನು ದೂರಾಗುವುದು ಖಚಿತ
ಈ ಎಲ್ಲ ನೋವುಗಳು ನಂಟಿನ ಹೆಸರಲಿ ನನಗೆ ಉಚಿತ
ಹೇಳಿರುವರು ಕೊಟ್ಟ ಹೆಣ್ಣು ಕುಲಕೆ ಹೊರಗೆಂದು
ತಾವು ಕಂಡ ಕೂಸೆ ನಮ್ಮವಳಲ್ಲವೆಂದು ನೊಂದು
ಪರರ ಮನೆಯ ಸೊತ್ತಂತೆ ಇನ್ನೂ ನಾನೆಂದು
ಆಡಸಿ ಬೆಳೆಸಿದವರೆ ಪರರಾಗುತಿರುವರು ನನಗಿಂದು
ಹುಟ್ಟಿದ ಮನೆಗೆ ಅತಿಥಿಯಾಗುವೆ ತಿಳಿಯೆನು ಯಾಕೆಂದು
ಉಡುಗೆ ತೊಡುಗೆ ಬದಲಾಗಬೇಕಿದೆ ಅಪ್ಪನ ಬೀಳ್ಕೊಡುಗೆಯಲಿ
ಇನ್ಯಾರೊ ಜೊತೆಯಾದವರ ಸಲಹಬೇಕು ಅಮ್ಮನ ಕಾಳಜಿ ಅಕ್ಕರೆಯ ನೆನಪಿನಲಿ
ಒಡಹುಟ್ಟಿದವರು ಕಾಣೆಯಾಗುವರು ಬೇರೆ ಮನೆಯ ಸ್ವತ್ತೆಂಬ ಆತಂಕದಲಿ
ನನ್ನೊಳಗಿನ ನನ್ನನೆ ಮರೆಯಬೇಕಿದೆ ಇನ್ಯಾರದೊ ಮನೆಯ ಸೇರುವ ನೆಪದಲಿ......
- ಶ್ರೀಕಾವ್ಯ
06 Jul 2017, 10:32 am
Download App from Playstore: