ಹುಡುಕಾಟ
ಓ ತಾಯೆ ನೀನೆಲ್ಲಿರುವೆ
ಕಾಣುವ ಕಾತರದಿ ನಾನಿರುವೆ!
ಮುಂಜಾನೆ ಮಂಜಿನಲಿ
ಮಡಿಯುಟ್ಟು ಗುಡಿಯಲಿ
ಭಜಿಸಲು ನಿನ್ನ ದರ್ಶನ ಸಾಧ್ಯವೆ
ಓ ತಾಯೆ ನೀ ಬಾರೆಯ!
ನನ್ನೆಲ್ಲ ಮನದ ಮಾತ ಉಸುರುವೆ
ನೀ ಆಲಿಸುತಿರುವೆ ಎಂದರಿತು
ಮಂದಹಾಸದಿ ಮೂಡಿರುವ
ಚಿತ್ರಪಟದ ಮುಂದೆ ನಿಂತು
ಓ ತಾಯೆ ನೀನೆಂದುಬರುವೆ!
ಕಂಡ - ಕಂಡ ಗುಡಿಯಲ್ಲು
ನೀನೆ ಇರುವೆಯೆಂದು
ಭಯದಿ ನೂರು ಬಾರಿ ಭಜಿಸುತ್ತ
ಭಕ್ತಿಯಲಿ ಹರಕೆ ಹೊರುತಿರುವೆನಿಂದು
ಓ ತಾಯೆ ಮೊಗವ ತೋರೆಯ!
ಇಹಲೋಕದ ಪುಣ್ಯ ಕ್ಷೇತ್ರಗಳಲ್ಲಿ
ಪಾಪ ತೊಳೆವ ಪವಿತ್ರ ನದಿಗಳಲ್ಲಿ
ನಿತ್ಯ ನಿನ್ನ ಪಠಿಸುವ ಆರವರಲ್ಲಿ
ನೀನಿರುವೆಯ ಓ ತಾಯೆ ಹೇಳೆಯ!
ನರರು ನಿರ್ಮಿಸಿದ ಕಟಕಟೆಯಲ್ಲಿ
ಶಿಲ್ಪಿ ಬೆವರ ಸುರಿಸಿ ಕೆತ್ತಿದ ಕಲ್ಲಿನಲ್ಲಿ
ಕಲ್ಮಶಭರಿತ ಮಂತ್ರಗಳ ಪಠಣೆಯಲ್ಲಿ
ಎಲ್ಲಿರುವೆ ನೀ ? ಓ ತಾಯೆ ಕಾಣೆಯ!
ಓ ತಾಯೆ ನೀನೆಲ್ಲಿರುವೆ
ಕಾಣುವ ಕಾತರದಿ ನಾನಿರುವೆ!
- ಶಕುಂತಲಾ
09 Jul 2017, 06:29 pm
Download App from Playstore: