ಬೇಡ ಈ ಬವಣೆ
ಬಡತನದ ಬೇಗೆಯೊಳಗೂ
ಈ ದೇಹಕೆ ಸೌಂದರ್ಯದ ಕಾಣಿಕೆ
ಚಿಂದಿ ಹುಟ್ಟ ಈ ಮೈಯಿಗೆ
ಬೀದಿ ಕಾಮಣ್ಣರ ದಬ್ಬಾಳಿಕೆ
ಹಸಿದ ಹೊಟ್ಟೆಗೆ ಕೂಳಿಲ್ಲ
ಕಾಮದ ಹಸಿವಿದ್ದವಗದು ಕಾಣಲ್ಲ
ಕಿತ್ತು ತಿನ್ನುವ ಬಡತನದೊಳಗೆ
ಕಾಮರಕ್ಕಸರ ಆಕ್ರಮಣ ತಪ್ಪಿಲ್ಲ
ಮೈಮಾರಿದ ಬಿಡಿಕಾಸಿನೊಳಗೆ
ನನ್ನವರ ಮಾನ ಮುಚ್ಚಬೇಕು
ಕಾಮಾಂಧರ ಆ ಶೋಷಣೆಗೆ
ಅಸಹಾಯಕ ಕಿಚ್ಚನು ಬಚ್ಚಿಡಬೇಕು
ವೇಶ್ಯೆಯ ಮುಟ್ಟುವವರೆಲ್ಲ
ಸಮಾಜದಿ ಘನತೆವೆತ್ತವರೇ ಎಲ್ಲ
ಕಾಮದ ಬೆವರಿನಲ್ಲಿ ಮಿಂದರೂ
ಅದರ ಘಮಲನೂ ಮರೆಸಿದೆ ಅತ್ತರು
ಮೈಕೊಟ್ಟ ತಪ್ಪಿಗೆ
ನನ್ನ ವೃತ್ತಿಗಿಲ್ಲ ಒಪ್ಪಿಗೆ
ಅವರೆಸೆವ ಭಿಕ್ಷೆಯ ಆಯ್ದು
ಬದುಕ ಕಟ್ಟಿಕೊಳ್ಳಬೇಕಿಂದು
ಬೇಡ ಇನ್ನಾರಿಗೂ ಈ ಬವಣೆ
ನಾಗರಿಕ ಸಮಾಜ ನೀಡದು ರಕ್ಷಣೆ
ಬಡತನದ ಹೆಣ್ಣೊಂದು ಹುಣ್ಣು
ಎಲ್ಲರನ್ನೂ ಸಹಿಸುವುದೊಂದೆ ಮಣ್ಣು
0654ಪಿಎಂ04082017
*ಅಮುಭಾವಜೀವಿ*
- ಅಮುಭಾವಜೀವಿ (ಅಪ್ಪಾಜಿ ಎ ಮುಸ್ಟೂರು )
06 Aug 2017, 07:04 am
Download App from Playstore: