ಹೊಸ ವರುಷ 2017
ನೃತ್ಯ ನಾಟ್ಯ ಡಿಸ್ಕೋಗಳಿಗೆ ಹೆಜ್ಜೆಹಾಕುವುದಷ್ಟಕ್ಕೆ ಸೀಮಿತವಾಗಿ ಹೋಗದಿರಲಿ ಹೊಸವರುಷ ! ಸಂಗಾತಿ ಸ್ನೇಹಿತರು, ನೆರೆಹೊರೆಯವರ ಮನವನು ಅರ್ಥೈಸಿಕೊಂಡು ಅವರೊಂದಿಗೆ ಹೆಜ್ಜೆಹಾಕುವಂತಾಗಲಿ ಈ ಹೊಸವರುಷ !! 1 !!
ತುಂಡು ಮಾಂಸ ಬಾಡೂಟ ಕುರುಕಲು ಸವಿಯಲಷ್ಟಕ್ಕೇ ಸೀಮಿತವಾಗಿ ಹೋಗದಿರಲಿ ಹೊಸವರುಷ ! ಪರರ ಕಷ್ಟ ನಷ್ಟಗಳಿಗೆ ಸ್ಪಂದಿಸುವ, ನಮ್ಮ ನೋವುಗಳನ್ನೂ ನಗು ನಗುತ ಸವಿಯುವಂತಾಗಲಿ ಈ ಹೊಸವರುಷ !! 2 !!
ಗಾಂಜಾ ಬೀಡಿ, ಗುಂಗುರು ಉಂಗುರಗಳ ಧೂಮ್ರಪಾನಗಳಿಗೆ ದಾಸನಾಗಿ ಹೋಗುವುದಷ್ಟಕ್ಕೇ ಸೀಮಿತವಾಗಿ ಹೋಗದಿರಲಿ ಹೊಸವರುಷ ! ಇಷ್ಟು ಕೊಟ್ಟ ದೇವರಿಗೆ ಧನ್ಯವಾದವನೇಳಿ ಮಧ ಮತ್ಸರ, ರಾಗ ದ್ವೇಷ ವ್ಯಸನಗಳಿಂದ ಹೊರಬರಲು ಸಂಕಲ್ಪ ಮಾಡಲನುಕೂಲವಾಗಲಿ ಈ ಹೊಸವರುಷ !! 3 !!
ಮಧು ಮಧ್ಯ ಮಧಿರೆಗಳ ಮತ್ತಿನಲಿ ಬರಿ ತೂರಾಡುವುದಕ್ಕೇ ಸೀಮಿತವಾಗಿ ಹೋಗದಿರಲಿ ಹೊಸವರುಷ ! ಮತ್ತು ನೆತ್ತಿಗೇರಿ ಮತ್ಯಾರಿಗೋ ನೋವುಂಟು ಮಾಡದೆ ಮುತ್ತಿನಂತಹ ಮಾತುಗಳಿಂದ ಎಲ್ಲರ ಮನವನು ಗೆಲ್ಲಲು ಮುಡಿಪಾಗಲಿ ಈ ಹೊಸ ವರುಷ !! 4 !!
ವಾಸ್ತು ಪೂಜೆ ಪುನಸ್ಕಾರಗಳನು ಮಾಡಿ, ಲಕ್ಷ ಕೋಟಿ ಆಸ್ತಿ ಕೋರಿ, ಅವನಿಗಷ್ಟು ಪಾಲು ಕೊಟ್ಟು ಇನ್ನಷ್ಟು ಲೋಭಿಗಳಾಗಲು ಸೀಮಿತವಾಗಿ ಹೋಗದಿರಲಿ ಹೊಸವರುಷ ! ಬಾಳಿಗೊಂದು ಅರ್ಥ, ಬದುಕಿಗೊಂದು ಗುರಿಯನಿತ್ತು 'ನಗದು ರಹಿತ ವಹಿವಾಟಿ'ನ ನಡವಳಿಕೆಯಂತೆ ನಡೆಯುವಂತಾಗಲಿ ಈ ಹೊಸವರುಷ !!5 !!
ಡಾ! ಸಿ. ಮುರಳೀಧರ 31 / 12 /2016
- ಡಾ!ಸಿ.ಮುರಳೀಧರ
27 Sep 2017, 10:39 pm
Download App from Playstore: