ಒಲವಿನ ಭೇಟಿ !
ನಿನ್ನನು ನೋಡುವ ಹಂಬಲವೇನೋ
ತುಂಬಲಾರದ ಹೃದಯದೊಳು,
ನನ್ನೊಳ ಬೇಗುದಿ ಕುದಿಯುತಲಿಹುದು
ತನ್ನೊಳ ತಾನೇ ಹಗಲಿರುಳು.
ಇಂದಿನ ಮಿಲನ, ಸ್ನೇಹದ ತನನ
ಎಲ್ಲಾ ಆ ಕ್ಷಣ ಸಂಪದವು,
ಒಬ್ಬರನೊಬ್ಬರು ಅರಿಯುತಲಿದ್ದರೆ
ಬಲ್ಲೆವು ನಮ್ಮನು ಅನುಕ್ಷಣವು.
ಬುಜಕೆ ತಲೆಯನು ಆನಿಸಿ ಚೆಲುವಿ
ಕೊಟ್ಟಳು ಮುಗುಳ್ನಗೆ ಮನ ಪಟಕೆ,
ಪಟ್ಟಳು ನೆಮ್ಮದಿ, ಇತ್ತಳು ಹೊನ್ನುಡಿ
ಮನಸು ಜಾರಿತು ಸಂಭ್ರಮಕೆ..
ಮೃದು ಮಲ್ಲಿಗೆ ಹೂ, ಕರಗಳ ಪಿಡಿದು
ಪಟ್ಟೆನೋ ನಾನು ಚಡಪಡಿಕೆ,
ಕೊಟ್ಟೆನೋ ಮುತ್ತ, ಕೆನ್ನೆಯ ಸುತ್ತ
ಪಡೆದಳೋ ಚಂದ್ರಿಕೆ ನಸು ನಾಚುತ್ತ..
ನನ್ನದು ಬಡತನ, ನಿನ್ನದೋ ಬಂಧನ
ಎರಡೂ ಮೀರುವ ಬಾ ಗೆಳತಿ,
ದುಡಿಯುತ ಹಾರುವ, ಎತ್ತರಕೇರುವ
ಎಲ್ಲವ ಮರೆತೂ ಬಾನಬಕೆ...
- ಶ್ರೀಗೋ.
15 Oct 2017, 12:35 am
Download App from Playstore: