ಪ್ರಕೃತಿ
ಪ್ರಕೃತಿಯ ಚೆಲುವಿಗೆ ಯಾವುದು ಸಾಟಿ
ಯಾರದು ಈ ಸೊಬಗಿನ ಸೃಷ್ಟಿಗೆ ಮೇಟಿ
ಅವನಿಗೆ ನನ್ನ ನಮನಗಳು ಕೋಟಿ ಕೋಟಿ
ಅತಿ ಅದ್ಭುತ ಅವನ ಈ ಸುಂದರ ಸೃಷ್ಟಿ
ಮತ್ತೆ ಹುಟ್ಟಿ ಬರುವ ಮುಳುಗೋ ರವಿ
ಸಾರುತಿರುವ ಏಳು ಬೀಳಲಿರುವ ಬಾಳ ಸವಿ
ಪೂರ್ಣ ಶಶಿಯಲ್ಲಿಯೂ ಕಲೆಗಳ ರಾಶಿ
ಅದರ ನಡುವೆ ಹಂಚುವ ಮನಸುಗಳಿಗೆ ಖುಷಿ
ಹಸಿರು ಕಾನನ, ಮಳೆಯ ಪ್ರೇಮಸಿಂಚನ
ನೀಲ ಗಗನ, ಭುವಿಯ ಪ್ರೀತಿ ಮಿಲನ
ಹಕ್ಕಿಗಳ ಚಿಲಿಪಿಲಿ ಇಂಚರ ಗಾನ, ನವಿಲ ನರ್ತನ
ಪ್ರಕೃತಿ ಒಡಲಲಿ ಸುಂದರ ಸಮ್ಮಿಲನ
ಬೆಳಗಿನ ಇಬ್ಬನಿ ಇರಬಹುದೆ ಕರಗುವ ಚಂದ್ರನ ಕಂಬನಿ
ಮೊದಲ ಮಳೆಯಲಿ ಮಣ್ಣು ಸುವಾಸನೆಯ ಖನಿ
ಬಾನಲಿ ಬೆಳ್ಳಕ್ಕಿಯ ಸಾಲು, ಮೇಘಗಳ ಮಾಲೆ
ಇಳೆಯಲಿ ಪಚ್ಚೆ ಪೈರು, ತಂಪು ಗಾಳಿ ಸ್ವರ್ಗ ಇಲ್ಲೆ
ನದಿಯ ಹರಿವು ಕಡಲ ಕಡೆಗಿನ ಒಲವು
ಧುಮುಕೊ ಜಲಪಾತ ಇಮ್ಮಡಿಸಿದೆ ಚೆಲುವು
ಝರಿಯ ಜುಳುಜುಳು ಗಾನವೇ ಸರಿ
ಬೆಟ್ಟ ಗುಡ್ಡಗಳ ಹಸಿರ ಸಾಲು ಸೌಂದರ್ಯಕೆ ಗರಿ
- ಶ್ರೀಕಾವ್ಯ
16 Oct 2017, 03:28 pm
Download App from Playstore: