ಮೂಗುತಿ ಸುಂದರಿ

ಮೂಗುತಿ :
ಬೀಗಬೇಡ ಹೆಣ್ಣೇ,
ನೀನೇ ಚೆಂದವೆಂದು,
ಕವಿ ಪಾಮರರು ಹೋಗಳುವರಲ್ಲೇ
ಬಲು ಅಂದವೆಂದು ನಿನ್ನ ಮೂಗು ಮೂತಿ.
ಮರೆತೇ ಬಿಡುವರು ಅಂದ ತಂದು ಕೊಟ್ಟ
ಪುಟ್ಟ ಮೂಗುತಿ.

ಹೆಣ್ಣು :
ಓ ಮೂಗುತಿಯೇ,
ನನ್ನಿಂದ ನೀನೊ, ನಿನ್ನಿಂದ ನಾನೊ,
ನನ್ನ ಮೂಗಿನ ಆಸನ ದೊರೆಯದೆ ಹೋದರೆ
ಅದೆಲ್ಲಿ ಬಿದ್ದಿರುತ್ತಿದ್ದೆಯೊ ನೀನು.
ನನ್ನ ಮೂಗ ಸುಮ್ಮನೇ ಏರಿದೆಯೇನು ?
ಚುಚ್ಚಿ ರಕ್ತ ಬರಿಸಿ ನೋವ ಕೊಡಲಿಲ್ಲವೇನು ?
ಹೂವಿನ ಜೊತೆಗೆ ನಾರೂ ದೇವರ ಮುಡಿಗೇರಿದಂತೆ,
ನನ್ನ ಅಂದದ ಮೂಗನೇರಿ ನೀ ಕುಂತೆ !

ಮೂಗುತಿ :
ಬೆಂಕಿಯಲಿಟ್ಟು ಸುಟ್ಟು, ಬಡಿದ ಸೊನಗಾರ,
ಚೆಂದುಳ್ಳಿ ಚೆಲುವೆಗೆ ಆಗದಿರಲೆಂದು ನಾ ಬಾರ.
ಕೊಟ್ಟ ಹೊಳಪ, ಹರಳ ಬಿಸುಪ,
ಹೊಳೆಯುವೆ ನಾನು,
ಸೆಳೆಯುವೆ ನಾನು,
ನನ್ನ ಹೊತ್ತು ತಿರುಗುವ
ನಿನ್ನದೇನು ಬಿಂಕ ಬಿನ್ನಾಣ ?
ನಾನಾದೆ ನಿನಗೆ ಸುಂದರ ಮೂಗಿನ ನತ್ತು,
ಆದರೇನು, ಬೇರೇನಿಲ್ಲ ನನಗೆ ಸವಲತ್ತು.

ಹೆಣ್ಣು :
ನನ್ನಿಂದ ನೀನು, ನಿನ್ನಿಂದ ನಾನು
ಇಬ್ಬರೂ ಪಡೆವೆವು ಬಿಗುಮಾನವನ್ನು,
ಹೆಚ್ಚಿತು ನನ್ನಂದ
ನಿನ್ನ ಇರುವಿಕೆಯಿಂದ,
ಮುನಿಸೇಕೆ ಮೂಗುತಿಯೇ ಈ ಇರುಳು,
ನಿನ್ನ ನಾ ದಿನವೂ ಒಪ್ಪವಾಗಿ
ಹೊತ್ತು ತಿರುಗುತಿರಲು.

- ಶ್ರೀಗೋ.

24 Oct 2017, 09:44 am

---

Download App from Playstore: