ಮರದ ಕೊರಗು
ಒಂಟಿಯೆಂದೇಕೆ ಕೊರಗುವೆ ಮರವೇ
ನೆಂಟರಿಲ್ಲದಾ ಈ ಜಗದೊಳಗೆ.
ಕುಂಟು ನೆಪಗಳು ಸಾಕಾಗಲಿಲ್ಲವೇ
ನಂಟು ತೊರೆದು ಒಬ್ಬಂಟಿಯಾಗಿರಲು!
ಬಯಲು ಬಿದ್ದ ಭೂಮಿಯನ್ನು
ಬಗೆದು ಬೇರನಿಳಿಸಿ ಕೆಳಗೆ
ಭುವಿಯ ಒಡಲ ನೀರ ಹೀರಿ
ಮೊಳಕೆಯೊಡೆದೆ, ಬರಿದೇ ಬೆಳೆದೆ.
ದಷ್ಟ ಪುಷ್ಟ ಕಾಂಡ ಬೆಳೆದು
ರೆಂಬೆ ಕೊಂಬೆ ಅಗಲವಿಡಿದು
ಹಸಿರು ಎಲೆಗಳ ಕೊಡೆಯನಿಡಿದು
ಹಕ್ಕಿ ಪಕ್ಷಿಗಳಿಗೆ ಹಣ್ಣು ಬೆಳೆದು.
ಮರವೆಂದರೆ ಬಾರದಿರುವವೇ
ಹಕ್ಕಿ ಪಕ್ಷಿ ಬಾನಾಡಿ
ಕಟ್ಟದಿರುವವೇ ಗೂಡು
ಸಂಗಾತಿಯ ಒಡಗೂಡಿ.
ಹಾರದಿರುವವೇ ಮರವ ಮರೆತು,
ತೊರೆಯದಿರುವವೇ ರೆಕ್ಕೆ ಬಲಿತು.
ಬೆಳೆಸಿಕೊಳ್ಳದಿರು ಮರವೇ
ಹಕ್ಕಿಯೊಡನೆ ಬಾಂಧವ್ಯ ಸಲುಗೆ,
ಹಾರಲಾರೆ ನೀನೆಂದಿಗೂ
ಅವುಗಳೊಡನೆ ಬಾನಂಗಳಕೆ.
ನಿಲ್ಲು ಎದೆ ಗಟ್ಟಿ ಮಾಡಿಕೊಂಡು ಮತ್ತೊಮ್ಮೆ
ಬರಬಹುದು ಹಕ್ಕಿ ಹಿಂಡು
ಹುಡುಕಿಕೊಂಡು ನಿನ್ನನ್ನೇ...
- ಶ್ರೀಗೋ.
09 Nov 2017, 10:28 pm
Download App from Playstore: