ಎಲ್ಲಿರುವೆ ನೀನೆಲ್ಲಿರುವೆ.....?
ಹೇ ತಾಯೆ .......
ಹೆ ದೇವನೆ.......
ಹೆ ಭಗವಾನ್......
ಎಲ್ಲಿಹೆ ನೀ ನುಡಿ ಮೆಲ್ಲನೆ !
ಕಾಲುಹಾದಿಯಲ್ಲಿ
ಕಾಲಿಗೆ ಅಡ್ಡಿ ಒಡ್ಡಿದ
ಕಲ್ಲನೊಯ್ದು ಇಲ್ಲಿ
ಮೂರ್ತಿ ಮಾಡಿದ
ಶಿಲ್ಪಿಯಲ್ಲಿ ನೀನಿರುವೆಯ!
ನಿರಾಶ್ರಿತರಾದ ನಿಮಗೆ
ಆಶ್ರಯ ನೀಡಲೋಸುಗ
ಹಗಲು- ಇರುಳು ದುಡಿದು
ಮಂದಿರದ ನಿಮ್ರಾತೃಗಳಾದ
ಕೂಲಿಕಾರರ ಮನದಲ್ಲಿ ನೆಲೆಸಿರುವೆಯ!
ಮಂತ್ರಗಳ ಮಳೆಗರೆಯುತ್ತ
ಘಂಟೆಯ ಗರ್ಜನೆ ಮಾಡುತ್ತ
ದೀಪದಿ ಲೋಕಬೆಳಗುವೆನೆನುತ್ತ
ಅಜ್ಞಾನ ಕೂಪಕ್ಕೆ ಭಕ್ತರ ತಳ್ಳುತ್ತ
ಉದರ ಹೊರೆಯುತಿಹ ಹಾರವರಲ್ಲಿರುವೆಯ!
ಅರಿಷಡ್ ವರ್ಗಗಳ ತವರಾಗಿ
ಸನ್ಯಾಸಿಗಳ ನಾಯಕರಾಗಿ
ಕಪಟತನದಲಿ ಕಾವಿಯ ವೇಷಧಾರಿಗಳಾಗಿ
ಸೋಗಿನ ವಿದ್ವಾಂಸಕರಾಗಿ
ಮೆರೆವ ಮಾಯಾವಂತರಲ್ಲಿ ನೀನಿರುವೆಯ!
ಸಂಪ್ರದಾಯಗಳ ಶಿರದಲ್ಲಿ ಹೊತ್ತು
ಮಾನವೀಯತೆಯ ಮಣ್ಣಲ್ಲಿ ಹೂತು
ವಿಧ- ವಿಧದ ಉಡುಗೊರೆಗಳನಿತ್ತು
ಬಹು ವಿಧಗಳ ವ್ರತಗಳ ಮಾಡುತ್ತ
ಗುಡಿ- ಗೋಪುರಗಳ ಸುತ್ತುವ ಭಕ್ತರಲ್ಲಿರುವೆಯ!
ಎಲ್ಲಿರುವೆ ನೀ.......
ಕಾಣದ ಕಡಲಾಳದಲ್ಲವಿತಿರುವೆಯ
ತಂಪು ಸೂಸುವ ತಂಗಾಳಿಯಲ್ಲಿರುವೆಯ
ಎಲ್ಲೆ ಮೀರಿ ಹಾರುವ ಬಾನಾಡಿಯಲ್ಲಿರುವೆಯ
ಎಲ್ಲಿರುವೆ ನೀ........?
ನುಡಿ ಬಾ ಮೆಲ್ಲನೆ........!
ಶಾರಧ
- ಶಕುಂತಲಾ
24 Nov 2017, 05:00 pm
Download App from Playstore: